Në seancën e shtatëmbëdhjetë të ditës së sotme, të Nënkomitetit për inovacione, shoqëri informatike dhe politikë sociale në Komisionin Evropian, ministri i Shoqërisë Informatike dhe Administratës Jeton Shaqiri, mbajti fjalimin hyrës në cilësinë e bashkëkryesuesit.
Ministri Shaqiri, potencoi rëndësinë e vendit tonë në aspekt të përmbushjes së të gjitha detyrave në suaza të Nënkomitetit edhe përballë të gjitha sfidave lidhur me pandeminë.
,,Qeveria mbetet edhe më tej e përkushtuar në implementimin e reformave kyçe të theksuara në Raportin e Komisionit Evropian për vitin 2020-të dhe organizimin e dialogut efikas me Bashkimin Evropian. Procesi i integrimit të Republikës së Maqedonisë së Veriut në Bashkimin Evropian mbetet prioriteti strategjik për zhvillimin, stabilitetin dhe prosperitetin e vendit dhe ne mbetemi të përkushtuar në këtë proces”, theksoi ministri Shaqiri.
Sipas ministrit, me rëndësi të veçantë është mbajtja e dialogut të rregullt me Komisionin Evropian në suaza të Marrëveshjes për stabilizim dhe asocim, në këndvështrim që siç theksoi, ky nënkomitet paraqet forum kryesor për vendosjen dhe avancimin e dialogut në kontinuitet në sfera të rëndësishme siç janë arsimi dhe kultura, shoqëria informatike dhe mediat, politika sociale dhe punësimi, shkenca dhe hulumtimi.
Në takim, mes tjerash u diskutua për Progresin në aspekt të rekomandimeve nga Raporti i vitit 2020-të, si dhe implementimin e konkluzioneve nga Nënkomiteti i vitit 2020-të.
Përndryshe, Nënkomiteti për inovacione, shoqëri informatike dhe politikë sociale është njëri prej trupave për të dialoguar ndërmjet Republikës së Maqedonisë së Veriut dhe Bashkimit Evropian, i themeluar në suaza të Komitetit për stabilizim dhe asocim.
